Dwaalkind

Die dwaalkind het gekom die dwaalkind is hier

’n grendel word gebreek in die na-naguur

sy skoene trap spore deur die vuur

hy is op soek na môre maar môre is hier

hy reis deur die woestyn en oor die wye see

sy liggaam is lig hy het alles oorgegee

in die doolhof van die wêreld lê die vergete tree

van iemand wat was is nou ’n vis in die see

die dwaalkind raak verlore in die mis van tyd

besittings is verbode als is vêr en wyd

nog ’n swerwer is gebore onder die Suiderkruis

’n pot goud is belowe maar sonder kaart of huis

in die oog van die maan word die kind ’n kraai

rigting raak verlore met die wind wat waai

sy tog laat geen spore tyd het hom verraai

die einde van die pad bly net om die draai

die dwaalkind is gebore sy pad vêr en wyd

tussen sterre is hy verlore die hemel oopgesluit

hy vlug deur engel-kore hy klop aan die ruit

wie oopmaak raak verlore dis die end van ’n stryd