Dawid was ’n Struikrower

Dawid was ’n struikrower die gesalfde van ’n land

Dawid met sy slingervel en ’n sterk regterhand

die veldslag is beplan die slagordes staan gereed

en die koning se dogter dra ’n nuwe kleed

Dawid jy is sterker as selfs die leeu en die beer

maar Dawid is jy sterk genoeg om die Koning te keer

die velde lê verlore en die kudde is verlaat

môre kom jy te staan teen die Koning se haat

die vrouens was vrolik en hulle dogters het gesing

baie het gesterf met die bloed hulde gebring

maar die Koning is boos en die spies was in sy hand

Dawid moet nou hardloop deur die hele land

Dawid kom na my toe sodat ek jou vlees kan gee

vir die voëls en die visse vir die diere en die see

die son trek jou bloed jou bene wankel in die hitte

skadu’s verdwyn in die wester-gloed ek het solank na jou gesoek

die Koning se dogter is vir jou gegee

’n nuwe-maan-offer tussen woestyn en see

en die krygsgeskreeu van ’n menigte kon jou nie keer

Dawid ons wag vir jou wanneer kom jy weer

Dawid ek ken jou en die tweestryd van jou hart

tussen die Koning en die liefde lê die dors en die smart

jy loop wye draaie in die heuwels en die veld

maar Dawid selfs met die twyfel bly jy altyd my held